Mbi 3 milion pasagjerë premton Ryanair për vitin 2025, në prag të nisjes së sezonit të dytë veror në Tiranë. Kompania ajrore nr. 1 në Evropë shprehet e përkushtuar të operojë në aeroportin ndërkombëtar të Tiranës me mbi 320 fluturime në javë drejt 23 destinacioneve tërheqëse. Kompania prezantoi edhe dy linja të reja drejt Lamezia dhe Varshavës-Chopin.
Programi i larmishëm i Ryanair për verën e 2025 garanton zhvillimin e mëtejshëm të turizmit, lidhje me tarifa të ulëta për qytetarët shqiptarë drejt dhe nga Tirana.
“Jemi shumë të lumtur që po rrisim lidhjet ajrore me Tiranën. Si pjesë e planit tonë, së bashku me ekipin e aeroportit dhe qeverinë, duam ta bëjmë Tiranën destinacionin numër një turistik në Evropë. Po punojmë me të gjithë për ta arritur këtë qëllim dhe mendojmë se mund të rrisim numrin e pasagjerëve nga 3 milionë sot në 5 milionë deri në vitin 2030, si dhe të hapim një bazë, që do të thotë se avionët tanë do të nisin dhe përfundojnë ditën e tyre këtu në Tiranë.” tha Shefi i Operacioneve Tregtare i Ryanair, Jason McGuinness
Puna e vazhdueshme për zgjerimin e aeroportit ndrëkombëtar të Tiranës që do të rrisë ndjeshëm kapacitetin, përbën një mundësi të madhe për Shqipërinë.
“Që prej fillimit të operacioneve të tyre në nëntor ’23, RyanAir ka mundësuar fluturimet e rreth 3 milionë pasagjerëve nga dhe drejt Shqipërisë, duke dhënë një kontribut të madh në rritjen tonë të qëndrueshme gjatë 2 viteve të fundit. Gjithashtu, Ryanair ka ndikuar në qasjen tonë të operimit, duke ndihmuar skuadrën për të realizuar procedura më produktive dhe të bashkërenduara. Prezenca e tyre do sjellë rezultate edhe më pozitive në vitet në vijim, veçanërisht me rrjetin e tyre të gjerë që rrit numrin e destinacioneve direkte nga TIA.’’
Aeroporti Ndërkombëtar i Tiranës vazhdon të mbetet një destinacion konkurrues përsa i përket tarifave operacionale. Deri tani RyanAir ka mbështetur hapjen e mbi 2,200 vendeve pune në Shqipëri. Ndërsa me rastin e prezantimit të programit veror, Ryanair ka shpallur një promocion 3-ditor, me bileta që fillojnë nga vetëm 19.99 euro, të disponueshme për udhëtarët./abcnews.al
